- ATUR PEMADU BARU DATAI ENGGAU MISA
Belabuh ari Bulan Sepuluh tu, raban gerija, nyengkaum bala nembiak ke deka datai enggau Misa Hari Minggu mesti udah tembu nerima 2 dose vaksin. Minta nganjung setipikit udah divaksin lebuh nuan ngaga booking enggau misa.
2. PENATAI BA MISA
Minta kasih ari bala ke udah booking enggau misa, tentuka kita datai enggau misa. Enti nuan enda ulih datai, tulung madahka orang ke ngatur booking ngambika penuduk nuan tau diberi ngagai orang bukai.
Laban diatu sida ke bekuasa enda agi ngaga pengawa ti begigaka orang ke bisi kaul rapat enggau orang ke bisi positif covid-19 (contact tracing), nya alai nyadika tanggungjawab nuan empu ngambika selalu nentuka pengelikun enggau pengerai diri belama.
Enti kita bisi kaul rapat enggau orang ke bisi kes positif Covid-19, minta kita nyeliahka diri begaul enggau orang bukai (self-isolation) pengelama 2 minggu, ngaga peresa swab lalu nyeliahka diri ari enggau Misa. Enti nuan ngasaika diri enda gerai tauka bisi ngasaika diri tabin, batuk, sakit rekung, beresin tauka ngasaika diri pedis enseput, minta kita anang datai enggau Misa.
Laban pemayuh orang ti ulih enggau misa semina ditatak 50 iku aja, nya alai kitai diperansang anang booking tetiap misa Hari Minggu ngambi meri peluang ngagai orang bukai ke ka enggau misa mega. Kitai patut ngira orang bukai mega ka datai ke Gerija, nyengkaum sida nembiak ke udah tembu dituchuk vaksin. Gerija meransang sapa ke deka nerima Komuni Kudus datai enggau Misa Ninting Hari (Daily Masses), jam 7:00 pagi nengah booking lalu 6:30 lemai enggau chara datai terus (walk-in) di Gerija St. Anthony.
3. KURSUS KAWIN DALAM JAKU IBAN SECARA ONLINE
Kursus kawin dalam jaku Iban deka diatur kena Hari Enam, 23/10/2021 jam 8.00 pagi ngagai 2.00pm ngena chara online (zoom meeting).
Bujang dara ti ngelanggur diri deka nerima sabungjadi ba gerija tau ngerejister enggau kursus tu ba opis Gerija St. Anthony (016-2248126) enda laun ari 20/10/2021.
4. BEJUAL BUNGAI MAYA ALL SOUL DAY (2/11/2021)
Ladies Guild Stella Maris (LGSM) bisi bejual bungai dikena maya ALL SOUL DAY. Rega sepasu bungai RM35.00. Raban gerija ti deka meli bungai tau booking nengah Focal Person LGSM:
Pn. Catherine Jawan (012-8567331) enggau
Pn. Patricia Jeliah (019-8806312)
belabuh 10/10/2021 – 30/10/2021.
Bungai tau di ambi berengkah ari pukul 10 pagi – 5.00 lemai kena 1/11/2021 ba Stella Maris.
5. PEMINDAH BALA PADERI
Belabuh ari 3hb. Sebelas 2021 tu, Fr. Damian deka pindah ngagai Parish Good Shepherd, Marudi nyadi Ketuai Paderi (Rector) di din. Rev. Fr. Damian udah mela ba Gerija St. Anthony, Bintulu, kenyau ari Bulan Tujuh 2019 suba. Kitai meri terima kasih ngagai Allah Taala ke udah ngirumka Fr. Damian mela ba parish kitai lalu kitai besampi awakka Tuhan terus merekatka iya ba parish ti baru. Iya deka diganti enggau Fr. John Ciril, paderi Mill Hill ari India ke diatu agi mela ba Lapok.
Penerang ti silik agi tau dipeda ba FB enggau website gerija.
Fr. Andy Lee
Gerija St. Anthony, Bintulu
