Tabi menyadi dalam Kristus
Ketegal kes penyakit covid-19 nyau manjak nambah, selampur menua Sarawak kena atur mindah bertagang. Arinya, semua misa enggau aktiviti gerija diketuka ke dulu datai ke atur mindah betagang diketuka. Tang pengidup Kristian kitai ba parish tu deka ngiga cara serta jalai bakani nampi semua penusah nya, ngambika pengidup kitai mekang begulai dalam sakrementa enggau Tuhan serta beserakup dalam sembiang enggau diri sama diri, enda ngira dini endur kitai. Tu sekeda ari cara ti diatur:
1. Misa Tiap Hari enggau Misa Hari Minggu bisi diatur nengah Live streaming online belabuh Hari Minggu, 24 Jan 2021 (peda jadual & jam) sampai ke atur bertanggang mindah diketu.
2. Office gerija dibuka baka selama serta Paderi ulih di contact enti bisi perkara ti enda ulih ditangguh baka ngunsut Minyak Urang Sakit Raya & perkara ti besangkut paut enggau nguburka bala ti udah nadai.
3. No tel baru Parish Office 0162248126 ke ulih di telefon raban gerija enti bisi berkaul enggau perkara baka ke dibaruh tu:
a. Deka Muai Penyalah, Ngunsut Minyak Urang Sakit Raya, Meri Tubuh Kristus ngagai urang ti sakit, di rumah tauka di spital.
b. Deka nerima sara penemu senentang baca hari minggu, pesan ari Rector enggau Berita Gerija.
c. Ngerejister enggau kelas ti deka atur ba Parish baka Kelas RCIA, Baptisa Anakmit, Pengentap, NFP, Kursus Kawin, tauka perkara kebukai.
d. Minta ngaga misa (nyengkaum Misa ka Urang Ke Udah Parai tauka Misa Ke Urang Parai). Tuliska nama urang ti parai enggau tuju misa, screenshot (gambar) serta enggau bank-in slip pemeri kita, anjung ngagai no telepon gerija. Pemeri nya dibank-in ngagai account St Anthony’s Church Fund, Maybank Account Number : 511065519336). Gerija deka madah ngagai kita, kemaya sida ngatur misa ke peminta nya.
e. Meri buah penemu ti manah ngagai Rector, bakani cara ngemanah ke agi ngibun/ngintu raban gerija dalam parish tu.
Ke penerang, maya jam bekerja, telepon 0162248126 di ibun staf Parish
enti maya ukai jam bekerja di ibun Rector.
4. Parish deka bisi webpage kediri empu enda lama agi, dikena ngemanah ke cara ngerembai serta berkongsi ke berita / penemu ari gerija. Berita ke silik agi pasal tu deka dipadah ke enda lama agi.
5. Taja kitai enda ulih begempuru bebala maioh enggau batang tubuh jam kediatu, tang aku meransang semua raban / kumpulan besembiang serta HCG ngena online baka Zoom tauka Google Meet betemu secara alam maya bebagika Jaku Allah Taala dikena nengap ke pengarap raban diri ba maya penusah ke nyadi diatu.
Awak ke lebuh maya kitai ngintu Hari Minggu, Jaku Allah Taala saritu,
“Jaku Kristus enggau semua pemadas iya patut meruan dalam ati kita.
Tusoi serta ajar pangan diri ngena semua penemu dalam.
Bepantun masmor, lagu sembah puji Tuhan enggau lagu ti datai ari Roh Kudus; bepantun ngagai Allah Taala ngena jaku puji dalam ati kita.”
Kolosi 3:16
Fr. Andy Lee
Hari Minggu Jaku Allah Taala (24 January 2021)
Gereja St. Anthony, Bintulu
